一個人的餐桌系列 - 群記牛腩
前幾天下午剛做完job在街上閒逛時，五臟廟忽然發出訊號，要揾D嘢填肚。原先想找間漢堡店食個牛肉漢堡，及後經過灣仔道一間牛腩粉麵店，想起朋友說過質素不錯的，遂趁機入去一試。
望望餐牌，除了基本的坑腩外，還有多種不同部位可供選擇，好似牛爽腩、崩沙腩、牛面頰（牛面珠墩）、牛脷和牛展等，都幾齊全幾特別，而且價錢都算大衆化，最貴果款都只是$29，由於我去的時候已屆下午茶時段，這價錢還會包括一杯熱飲，實屬超值。我叫了一碗牛爽腩河粉，可能因一隻牛的爽腩部分不是太多，所以只有數塊爽腩加幾件牛腩充數。爽腩軟糯彈牙，帶少少肥油甘香口感；牛腩雖有點偏瘦，勝在咬落鬆軟唔韌。湯底色澤呈褐色，飲落味道濃郁唔油膩，但牛味偏淡；河粉闊度屬傳統size那種，吸收了湯汁，正好中和了濃膩感，細嫩順滑，跟牛腩或魚蛋一向是絶配。值得一提的是粉麵裡頭還伴有清甜無渣的蘿蔔和爽口芽菜，為味蕾帶來了一點點清新感覺。
綜觀整碗爽腩河質素未算超班，不能與中環歌賦街那間名店同日而語，但將貨就價下，一分錢一分貨，亦不會要求太高，個人覺得是各有特色，算是超值好食，值得推介的！
Search